Kryetari i komunës së Vitisë, Sokol Haliti, priti sot në takim Ambasadorin Gerard McGurk, i cili ka marrë detyrën si Shef i ri i Misionit të Organizatës për Siguri dhe Bashkëpunim në Evropë (OSBE) në Kosovë. Gjatë këtij takimi, u diskutua për bashkëpunimin e deritanishëm ndërmjet komunës së Vitisë dhe OSBE-së, si dhe për mundësitë e thellimit të këtij bashkëpunimi në fusha të ndryshme në interes të gjithë qytetarëve. Kryetari Haliti e njoftoi Ambasadorin McGurk për zhvillimet e përgjithshme në komunën e Vitisë, duke theksuar bashkëjetesën e mirë të të gjitha komuniteteve etnike dhe fetare në këtë komunë. Po ashtu, ai foli për punën dhe angazhimin e institucioneve komunale në shërbim të qytetarëve të saj, duke theksuar se kjo bashkëjetesë është një ndër vlerat më të rëndësishme që e karakterizojnë komunën e Vitisë. Në përmbyllje të takimit, kryetari Haliti e falënderoi Ambasadorin McGurk për mbështetjen e vazhdueshme që ka marrë komuna e Vitisë nga OSBE, në fusha dhe projekte të ndryshme dhe shprehu gatishmërinë për vazhdimin e bashkëpunimit të ngushtë, me qëllim të forcimit të institucioneve dhe përmirësimit të kushteve të jetesës për të gjithë qytetarët e komunës pa dallime. Në anën tjetër edhe Ambasadori MCGurk shprehu mirënjohje për bashkëpunimin afatgjatë dhe të thellë të komunës së Vitisë dhe OSBE-së, duke theksuar se si komunë do ta keni përkrahjen e plotë në të gjitha projektet. Gjatë këtij takimi kryetari Haliti pati një dhuratë simbolike për ambasadorin McGurk.
